- "دا انت طلعت ابن صايعة.... يا وله" أول جملة جت على بالى بعد ما خلص الراجل كلامه وأنا من هنا بعلن أسفى القليل على ترقيتى السابقة بس متتعشموش خير، بمعنى الحوار وهو شخصيا عليهم تحفظات كتير: - الراجل ذكى قوي.... قوي.... ولماح وعنده حضور وكاريزما فظيعة ودارس وقارى فى تاريخ الدول وحتى الكلام اللى مكتوب له زى آيات القرآن والإنجيل والتوراة.... حافظه نصا ومعنى ومفيش ورقة قدامه ابن الإيه، ولا حتى ميكرفون فى ودانه، ازاى كده... دا احنا متعودين على اللى بيفوكوا الخط أصلا..... حسيت انه واخد دورة تدريبه فى جيل المستقبل اللى هو شباب بجد، يبنى مش يهد، بس خلاص ديه الميزة الوحيدة فى الحوار. كلام الراجل زى اللى قبله واللى قبله وخد عندك (على قد ما افتكر بقي) وترجمة الحوار الاصلية هتكون بين الأقواس: - أمريكا وإسرائيل بينهما علاقات عمرها ما تتكسر (الترجمة: اللى هيقرب لإسرائيل هطلع تيييت امه... دول بياكلونا ياجدعان). -لازم فلسطين تعترف بوجود دولة إسرائيل (مش بمزاجهم اعترفوا بالذوق بدل ما تتلبوا). - انا أمرت بغلق جوانتامو آخر السنة (اهو نكون فتحنا الثلاثة الجداد عقبال عندكم). - احنا ها نفتح السكة قدام الطلاب (تعالوا أمريكا ونستفاد منكم إحنا.... الحلم الأمريكى كالعادة). - احنا تعبنا كتير بسبب 11 سبتمبر (احنا فجرنا الأبراج عشان الجيش مش لاقى شغل). - احنا ها نسيب العراق على 2012 (يا مين يعيش وابقوا قابلوني). - لازم نعمل منح زى اللى جابت ابويا امريكا (ربنا يخلى المنح اللى عملتنى رئيس... بس طبعا مفيش حد فيكم تجيله منحة يفكر يبقى رئيس). - احنا مش ها نفرض الديمقراطية على حد (احنا ها نفرض الديكتاتورية والاستعمار). - احنا مش بنوجه اهتمامنا للنفط حاليا.. بندور على العقول الشابة (احتمال نضرب اليابان أو كوريا أو حتى الصين). - مشكلة إيران النووية هتتحل (ها يحصل فيهم زى العراق... ها يضربوا نووي... ها ضرب هيدروجينى وكيماوي). - الدول كلها لازم تستخدم القوة النووية السلمية بس والأسلحة لا (إلا طبعا أمريكا.... عشان نعرف نضرب بيه وقت اللزوم). - الديمقراطية مش بس انتخابات (حاسس انه بيخبط فى حد). ـ نرجع تانى للراجل... الراجل كان ها يخلى الدمعة تفر من عينى، كان ناقص مزيكا فيلم السادات ولا ناصر 56 واجرى عليه واحضنه، الصياعة فن، ومش كل واحد ينفع يبقى رئيس، فى رئيس يضحك على كام مليون لكن واحد يقرطس كام مليار، ارفع له العمة الصراحة، كلامه كويس بس مش عارف أبلعه، لأنه نفس كلام كلينتون، هما تقريبا بيحفظوا الكلام هو هو، بس كل واحد وطريقته فى الإلقاء. - عاجبنى الشعب المصرى وتصفيقه فى النهاية، أنا خفت حد يطلع ويقول له العلاوة يا ريس. - معتقدش إن كلامه ده ها يتنفذ والسبب إننا سمعنا نفس الحوارات دى ومش معنى انه جالنا هنا يبقى الراجل بيحبنا، ده بس عندهم تصليحات فى البيت الأبيض لان المدام بتاعته مش عاجبها الحمام وكان بينقط على مكتب السى اى ايه اللى فى البدروم عندهم، فقال لك ازور الهرم وأتصور جنبه وأقول لى كلمتين واخلع عشان ألحق الغداء. نرجع بقى للامتحانات، ويا بخت من زار وغار!!
تقييم المقال 
